L’aragonés y lo catalán en l’actualidat. Analisi d’o Censo de Población y Viviendas de 2011

Reyes, Anchel ; Gimeno, Chabier ; Montañés, Miguel ; Sorolla, Natxo ; Esgluga, Pep ; Martínez, Juan Pablo

-
2017
Zaragoza
---

Abstract: Si bien la mas gran parte d’os estudios publicaus sobre las luengas d’Aragón s’han feito en o tocant a lo estudio lingüistico, encara cal fer muito camín pa afundar en o conoiximiento d’a realidat sociolingüistica aragonesa, ye decir, en o conoiximiento sobre la situación social d’as luengas. Fa falta datos que fagan posible chestionar la diversidat lingüistica que suposa que en una mesma comunidat exista tres luengas autoctonas en contacto como son lo castellano, lo catalán y l’aragonés. Iste informe ye una ferramienta de treballo y reflexión pa las dos luengas historicas d’Aragón: lo catalán y l’aragonés, aón informamos con datos scientificos a los diferents actors socials y politicos d’o marco cheneral d’a situación sociolingüistica aragonesa. No ye la primer vez que s’estudia la presencia d’as luengas y lo numero de parladors, ya que existe precedents como la “Encuesta de Usos Lingüisticos de la Franja” de 2003 (Sorolla, 2005) y 2014 (Sorolla, 2015a; Sorolla et al., 2017) u l’inedito, dica chinero de 2017, “Estudio sociolingüístico de las hablas del Alto Aragón” (Llera, 2001), de l’equipo d’a Universidat d’o País Basco, responsable de l’Euskobarometro. Pero sí que ye la primer vez que tenemos una fuent publica d’información sobre los charradors d’as luengas propias de tot Aragón con una alta fiabilidat estatistica y tamién la primer vez que se puede analisar la realidat lingüistica d’a ciudat de Zaragoza y d’a resta de ciudatz aragonesas de mas de 10.000 habitants (Monzón, Fraga, Balbastro, Chaca, Alcanyiz, etc.). No somos debant d’una monografía con animo d’exhaustividat academica. Iste informe fa parte d’un proceso d’un equipo de treballo arroclau arredol d’o Seminario Aragonés de Sociolingüistica (seminario especifico de l’Asociación Aragonesa de Sociología, integrada en a Federación Española de Sociología). Ye un exercicio d’accountability u rendición de contos d’o treballo realizau. Y lo suyo obchectivo ye servir d’accelerador en os diagnosticos d’a situación lingüistica en Aragón, ta disenyar unas politicas publicas (policy) lo mas cercanas posibles a la realidat. Lo esprito d’iste informe, por tanto, s’acerca mas a formulas anglo-saxonas de caracter profesional y de consultoría, que no pas a tradicions mas academicistas. A la finitiva, esperamos que istes datos fagan honra a la sociedat aragonesa y que sirvan a las diferents institucions, y entidatz socials en a fayena d’establir una politica linguistica adequada a la realidat.